Po, përdorimi i Modalitetit të Fuqisë së Ulët ngadalëson iPhone-in tuaj.

Modaliteti i Fuqisë së Ulët në iPhone nuk është një veçori e re. Në fakt, ai u prezantua me iOS 9 në vitin 2015. Megjithatë, herë pas here, përdorues të ndryshëm, ankohen pse iPhone-i i tyre i ri funksionon ngadalë.
Çfarë kanë të përbashkët disa nga këto raste? Screenshots ose video që tregojnë se Modaliteti i Fuqisë së Ulët (Low Power Mode) është i aktivizuar. Lexoni më tej për të kuptuar saktësisht se si kjo veçori ndikon në performancën e iPhone-it.

Si funksionon Modaliteti i Fuqisë së Ulët në iPhone?

Siç sugjeron edhe emri, Apple ka krijuar Modalitetin e Fuqisë së Ulët për t’i ndihmuar përdoruesit të zgjasin jetën e baterisë së iPhone-it në situata kur e dinë se do të kalojnë një kohë të gjatë pa një karikues pranë. Kur aktivizohet, ky modalitet ul konsumin e energjisë duke çaktivizuar disa veçori softuerike dhe harduerike njëkohësisht.
Megjithëse iOS i kërkon përdoruesit të aktivizojë Modalitetin e Fuqisë së Ulët kur bateria arrin 20%, kjo veçori mund të aktivizohet manualisht në çdo kohë.

Ja si e përshkruan Apple këtë veçori:

Modaliteti i Fuqisë së Ulët zvogëlon sasinë e energjisë që përdor iPhone ose iPad-i juaj kur bateria është e ulët. Kur Modaliteti i Fuqisë së Ulët është i aktivizuar, pajisja juaj do të zgjasë më shumë para se të ketë nevojë për karikim, por disa veçori mund të marrin më shumë kohë për t’u përditësuar ose për të përfunduar një proces. Gjithashtu, disa opsione mund të mos funksionojnë derisa të çaktivizohet Modaliteti i Fuqisë së Ulët ose deri sa të karikoni pajisjen tuaj në 80% ose më shumë.
Mund të kontrolloni nëse Modaliteti i Fuqisë së Ulët është aktiv duke parë ikonën e baterisë – nëse është e verdhë, atëherë pajisja juaj është në këtë modalitet.

Por çfarë ndryshon saktësisht Modaliteti i Fuqisë së Ulët në iPhone-in tuaj?

Apple ka publikuar një listë zyrtare në faqen e saj të internetit:
• Çaktivizon ose kufizon përdorimin e 5G (në varësi të modelit të iPhone-it)
• Vendos Auto-Lock në 30 sekonda
• Ul ndriçimin e ekranit dhe kufizon shpejtësinë e rifreskimit në 60Hz në pajisjet me ProMotion
• Çaktivizon Always-On Display në iPhone-t e përputhshëm
• Redukton efektet vizuale
• Ndalon aktivitetet në sfond (si shkarkimet, sinkronizimin me iCloud, backup-in dhe marrjen e emaileve)

A e ngadalëson iPhone-in tuaj? Po.

Megjithëse lista nuk përmend asgjë rreth performancës, Modaliteti i Fuqisë së Ulët gjithashtu e ngadalëson pajisjen kur është aktivizuar.
Për ta sqaruar, çipi brenda iPhone-it tuaj ka bërthama të shumta për performancë dhe efikasitet. Gjatë përdorimit të zakonshëm, iPhone-i mund të përdorë të gjitha bërthamat e çipit njëkohësisht, duke u fokusuar te bërthamat e performancës kur jeni duke edituar një video ose duke luajtur një lojë. Kur Modaliteti i Fuqisë së Ulët është aktiv, iPhone kufizon ndjeshëm përdorimin e bërthamave të performancës, duke u mbështetur kryesisht te bërthamat e efikasitetit – të cilat janë më të ngadalta, por konsumojnë shumë më pak energji.

Në një test krahasues të përdorur për të vlerësuar performancën e pajisjeve të ndryshme, ky është rezultati i çipit A18 Pro të iPhone 16 Pro Max kur Modaliteti i Fuqisë së Ulët është i çaktivizuar (sa më i lartë, aq më mirë):
• Single-core: 3341
• Multi-core: 8270

Ndërsa i njëjti test, i kryer me GeekBench 6 kur Modaliteti i Fuqisë së Ulët është aktiv:
• Single-core: 1384
• Multi-core: 4093

Siç mund ta shihni, Modaliteti i Fuqisë së Ulët ndikon ndjeshëm në performancën e iPhone-it duke ulur fuqinë e përpunimit në mënyrë që të kursejë energji.
Në thelb, pajisja funksionon me gjysmën e performancës kur ky modalitet është i aktivizuar. Si rezultat, mund të vëreni që telefoni juaj është më i ngadaltë, në varësi të detyrave që po kryeni. Kjo mund të duket e qartë për disa, por ka njerëz që befasohen kur e mësojnë këtë fakt.

Përmbledhje

Por të paktën mbajtja e Modalitetit të Fuqisë së Ulët aktiv gjatë gjithë kohës do ta bëjë baterinë të zgjasë shumë më tepër, apo jo? Epo, kjo varet. Testet tregojnë se Modaliteti i Fuqisë së Ulët është më efektiv në reduktimin e konsumit të baterisë kur pajisja është në stand-by, por ka më pak ndikim kur jeni duke e përdorur aktivisht telefonin.
Në këtë rast, është më mirë ta përdorni Modalitetin e Fuqisë së Ulët vetëm kur keni vërtet nevojë për të. Vlen të përmendet se ky modalitet është gjithashtu i disponueshëm në iPad, Mac dhe Apple Watch.